ٹائی ٹینک سے 5 گنا بڑا بحری جہاز باضابطہ طور پر دنیا کے سامنے پیش
دنیا کے سب سے بڑے بحری جہاز آئیکون آف دی سیز کو باضابطہ طور پر دنیا کے سامنے پیش کر دیا گیا ہے۔
رائل کیریبین نامی کمپنی کے 28 بحری جہازوں کے بیڑے میں آئیکون آف دی سیز کو شامل کر لیا گیا ہے۔
فن لینڈ میں تیار ہونے والے اس بحری جہاز کو 27 نومبر کو کمپنی کے حوالے کیا گیا۔
ڈیزائن سے لے کر اس کی تیاری تک ڈھائی سال کا عرصہ لگا۔
یہ جہاز ٹائی ٹینک سے 5 گنا زیادہ بڑا ہے جس میں 20 عرشے، نیویارک کے مشہور سینٹرل پارک کی نقل اور متعدد سہولیات دستیاب ہوں گی۔
اس میں ایک وقت میں 9950 افراد سفر کر سکیں گے اور یہ جنوری 2024 میں اپنے پہلے سفر پر روانہ ہوگا۔
یہ 1198 فٹ بلند جہاز ہے جس کا وزن 2 لاکھ 50 ہزار 800 ٹن ہے، اسی وجہ سے اسے دنیا کا سب سے بڑا کروز شپ قرار دیا گیا ہے۔
یہ بحری جہاز پہلے سفر کے دوران امریکی شہر میامی سے کیریبین جزائر جائے گا۔
اس میں 40 ریسٹورنٹس موجود ہیں جبکہ کمپنی کے مطابق اس میں بہت بڑا سوئمنگ پول بھی ہے جبکہ پہلی بار کسی جہاز میں واٹر پارک مسافروں کے لیے دستیاب ہوگا، جس میں 6 واٹر سلائیڈز ہوں گی۔
اس جہاز میں مجموعی طور پر 2805 کمرے تیار کیے گئے ہیں جن کو 14 مختلف کیٹیگریز میں تقسیم کیا گیا ہے، جیسے 3 منزلہ ٹاؤن ہاؤس کا ایک ہفتے کا کرایہ اوسطاً 75 ہزار ڈالرز ہے۔
اس کی سب سے سستی ٹکٹ بھی 1820 ڈالرز کی ہے جس کے دوران ایک مسافر 7 راتوں تک ایک عام کمرے میں قیام کرسکے گا۔
اس بحری جہاز میں ایک آبشار بھی تعمیر کی گئی ہے اور مسافر آئس شوز سے بھی لطف اندوز ہو سکیں گے۔
اس سے قبل دنیا کے سب سے بڑے بحری جہاز کا اعزاز بھی اس کمپنی کے ایک اور جہاز ونڈر آف دی سیز کے پاس تھا، جسے 2022 میں متعارف کرایا گیا تھا۔
اسی طرح کمپنی کی جانب سے اسٹار آف دی سیز کے نام سے ایک اور بحری جہاز کی تیاری بھی شروع کر دی گئی ہے جو 2025 کے موسم گرما میں اپنے پہلے سفر پر روانہ ہوگا۔
آئیکون آف دی سیز کے خاکے کمپنی کی جانب سے چند ماہ پہلے جاری کیے گئے تھے اور سوشل میڈیا پر وائرل ہوئے تھے۔
اس جہاز نے جون 2023 میں سمندری سفر کی آزمائش کامیابی سے مکمل کی تھی۔
Comments
Post a Comment
If you have any doubt, please let me know.